අපගේ සම්මා සම්බුදු රජාණන් වහන්සේ විසින් දේශනා කොට වදාළේ සම්බුද්ධ පරිනිර්වාණයෙන් පසුව ශාස්තෘන් වහන්සේව පුදනු සඳහා සුදුසූ වූ පූජනීය වස්තූන් තුනක් ඇති බව යි.

ඒ වනාහී, ශාරීරික ධාතූන් වහන්සේලා, පාරිභෝගික ධාතූන් වහන්සේලා සහ උද්දේසික ධාතූන් වහන්සේලා යි. 

උද්දේසික ධාතූන් වහන්සේලා යනු අප භාග්‍යවතුන් වහන්සේ සිහි කරමින් පිළිම වහන්සේ නමක් නිර්මාණය කොට පූජෝපහාර දැක්වීම යි.

හියුංසැයෑං භික්ෂුවගේ දේශාටන වාර්තාවට අනුව අප භාග්‍යවතුන් වහන්සේ වැඩසිටි සමයෙහි ම අප භාග්‍යවතුන් වහන්සේගේ පිළිම වහන්සේ නමක් සඳුන් ලීයෙන් නිර්මාණය කළ  බව සඳහන් වෙයි. 

පීත විමාන වත්ථුවෙහි සඳහන් වන්නේ ජීවමාන බුදුරජාණන් වහන්සේ වන්දනා කරන අයුරින් අප භාග්‍යවතුන් වහන්සේගේ පරිනිර්වාණයෙන් පසුව ද, සම සිතින් වන්දනාමාන කිරීමෙන් (චේතනාව සම වූ කල්හී විපාකය ද සම වන බව) සමාන විපාක ලැබෙන බව යි. 

එමෙන් ම මිළිඳු රාජ ප්‍රශ්නයෙහි, නාගසේන මහරහතන් වහන්සේ විසින් සිදුකරනු ලබන, භාග්‍යවතුන් වහන්සේ පිරිනිවීමෙන් පසු කරනු ලබන පූජෝපහාරයෙහි විපාක ඒ අයුරින් ම ලැබෙන බව උපමා සහිතව පැහැදිලි කළ විචිත්‍ර දෙසුමක් ඇත්තේ ය.